एनआरएनए भित्र बृहत् एकता गर्न रोविन शेरचनले गरे अपिल
एनआरएनए भित्र बृहत् एकता गर्न रोविन शेरचनले गरे अपिल
टोकियो । गैरआवासीय नेपाली संघका उपाध्यक्ष रोविन शेरचनले संस्थाभित्र बृहत् एकताका लागि अपिल गरेका छन् । सामाजिक सञ्जाल फेसबुकमार्फत शेरचनले आगामी मार्च महिनामा हुन गई रहेको एनआरएनएको १२ औँ महाधिवेशनमा निर्वाचन प्रणाली, डेलिगेट्स छनोट लगायतका विषयमा विवाद चर्किएको बेला शेरचनले त्यस्तो अपिल गरेका हुन् ।
एनआरएनएको १२ औँ महाधिवेशनमा अध्यक्ष पदमा उम्मेदवारी घोषणा गरेका शेरचनले निर्वाचन प्रणाली, डेलिगेट्स छनोट लगायतका विषयमा व्यापक छलफल गरी सहमतिको बिन्दु पत्ता लगाउन आग्रह गरे ।
जापान निवासी शेरचनले अहिले संस्था र प्रवासमा बस्ने नेपालीहरूको हितका लागि एकताबद्ध एनआरएनए नै प्रमुख आवश्यकता रहेको बताए । शेरचनले एकताको महाधिवेशनको विकल्प नभएको पनि बताए ।
अध्यक्षका प्रत्याशी शेरचनले सबैले आफ्नो हठ त्यागेर संस्थालाई एकताबद्ध बनाउन अपिल गरे । उनले व्यक्ति भन्दा पनि संस्थागत हितका लागि सबैले आआफ्नो ठाउँबाट भूमिका खेल्नुपर्नेमा जोड दिए ।
केही समय अघि आफ्नो घोषणा पत्र पनि सार्वजनिक गरेका शेरचनले एनआरएनको निर्वाचन भौतिकरुपमा गर्नु नै उपयुक्त हुने पनि बताए । स्टेरिङ कमिटीले निर्वाचन प्रणालीबारे सङ्कल्प प्रस्ताव ल्याउने निर्णय गरेकोतर्फ सङ्केत गर्दै शेरचनले सकेसम्म संसारभरकै सबै सदस्यहरूले मतदान गर्ने व्यवस्था गर्नु पर्नेमा जोड दिए ।
अहिले अनलाइन र भौतिक माध्यमबाट चुनावको विषयमा स्पष्ट निर्णय नभइसकेको अवस्थामा सबैलाई समेट्नका लागि सबै सदस्यले अनलाइनमार्फतबाट मतदान गर्न पाउने व्यवस्था उपयुक्त हुने पनि उनले उल्लेख गरे ।
विगतमा विभिन्न समूहमा विभाजित एनआरएनए नोभेम्बर ३० तारिखमा प्रधानमन्त्री सुशीला कार्कीको उपस्थितिमा एकताबद्ध भएका थिए । त्यति बेला भएको १० बुँदे सहमति अनुसार मार्च १४–१६ काठमाडौँमा १२ औँ महाधिवेशन हुँदै छ ।
